粤讲粤明
　　□李永源
　　
　　下昼，靓佬康畀电话我，话好闷，想我陪佢坐低叹番杯，我当时就愕然：佢出差前仲满面春风噃？

　　晚黑出嚟一睇，果然好受伤噉——佢话又失恋喇！不过呢次与别不同，“失”嘅係网恋。

　　其实，“样靓身材正”不嬲都係靓佬康揾对象嘅首要条件。噉就造成佢年近不惑都未成家，卒之成为钻石王老五。最近，佢浏览某交友网站，睇啱一个虽与自己年纪相当，但样貌清秀、身材骄人嘅女子，便点击交流。好快对方有回音，你来我往好啱倾；几日之后已打到火热，双方都相见恨晚。佢仲话，虽未通电话、未见过面，“但已经有咗一种久违嘅初恋感觉”。

　　嗰日，佢网上留言畀对方：“今日出差，唔得闲上网，有事打我手机。”几个钟后，手机响起，电话嗰边係女性，声音陌生而粗犷，既冇话揾边个亦唔肯自报姓名。问得两问佢就唔耐烦：“係咪打错吖，我唔识你噃！”搞咗一轮，最尾对方先话：“我咪係某某啰！”靓佬康一听，好似一盘冷水兜头淋落，心里直嗌：我意中人嗰把声点会噉咖！好唔容易，佢先镇定返：“你、你头先点解唔讲你嘅名吖？”“我想畀啲惊喜你吖嘛！”靓佬康心谂：“惊”就紧係啦，但唔知“喜”从何来？

　　好戏仲係后头，第日，心有余“痛”嘅靓佬康出完差返到屋企，打开电子邮箱，有封邮件，上写：“呢两张相係我前几日影嘅，让你先睹为快！”佢一点击，即时心都实晒，直头叫出声：“哇！佢係乜水！为咩同交友网站上嗰张天差地别啊？！”接落嚟，佢花足一个钟，将前后三幅相反复对照，再运用逻辑推理，终于得出—个让佢既“安慰”又想喊嘅结论：女朋友并冇存心欺瞒，三张相的确係同一人，区别仅在于拍摄时间唔同，相差大约15年以上啫……

郁闷～～～～～～

篇幅太长啦...

无奈!

相差15年……我顶……

我刚先系南方都市报见过呢篇也啊

仲有報紙睇添呀!

甘的野都比你撞到