【原文】子夏曰：“贤贤易色；事父母能竭其力；事君，能致其身；与朋友交，言而有信。虽曰未学，吾必谓之学矣。”

　　【译文】贤贤：第一个“贤”字，作动词用，係“尊重”嘅意思。贤贤，即係尊重啲贤能嘅人咁解。易色，呢个“易”字，有两种解释：一係改变，即係改变色心，唔做咸湿佬；二係轻视，即係轻视女色。致其身：即话要将生命献畀君主。

　　子夏话：一个人，如果能够尊重贤能，轻视女色；服侍父母能够尽心尽力，奉侍君王能够唔顾条命；交朋处友言而有信——噉嘅人，即管佢话佢未学过嘢，我都一定要话佢经已学过嘞。

　　【栋笃】嗱，上一节课，孔Sir讲咗，做弟子嘅要孝悌谨信博爱，做完呢啲，得闲先至“学文”。呢一节课，就係学生讨论发言嘅时间嘞。你睇，子夏同学好积极，即刻举手发言——咪住，睇下阿子夏同学嘅档案先：子夏姓卜名商，“子夏”係佢嘅字，佢出生于公元前507年，比孔子细咗44岁。孔子瓜咗，一鸡死一鸡鸣，子夏係魏国继续宣传孔子嘅思想同埋主张。嗱，佢哋师徒噉长气，我哋唔长气都唔得。孔Sir讲“行有余力则以学文”，子夏嘅表态係青出于蓝胜于蓝。佢认为，只要能够做到仁孝忠信，噉未学过嘢都等于学过嘞——直情比佢老师仲彻底添。睇嚟，如果子夏老师带研究生，唔跟佢都傻嘞——你话係仁孝忠信难定係考六级写论文难啊？嗱，呢两年，我百分百尊重阿教授你，你叫我做乜我做乜；我重友轻色，唔会换GF好似换衫咁快；我孝敬我老窦老母，我将青春献给党，我话请死党啤啤佢就啤啤佢……好嘞，两年一到，要毕业要交论文嘞，我同子夏教授话，教授啊唔好意思，呢两年我未学过嘢噃(汗)。唔使惊，子夏教授即刻话：“你话未学过就未学过咩？唔得，你一定学过。话你得，你就得，唔得都要得。嗱，硕士文凭攞去。”大佬，自古至今，边有咁大只蛤蝲随街跳啊！如果天下人人都听佢哋嘅话，我讲过，噉就益咗啲统治者嘞。一个人人都仁义忠信嘅礼仪之邦，唔理佢係“几乘”之国，统治起嚟，係好悭力嘅。唔信吖？“知识越多越反动”呢句话，係边啲人讲噶？咔咔。　

吓``````````````````````````````````````````````````

吓````````````````````